第三擊啦~~~~~~~~~~曲奇餅呀

又要講下個材料先
材料有淡牛油 20G,糖霜 40G,蛋半隻,麵粉 62G,發粉 2G(其實唔落都得),仲有古古力粒 25G
首先將糖霜+入牛油打起

將半隻蛋+入糖漿攪混

將麵粉用篩,篩鬆,之後+入蛋漿再攪混,都係起紋就好停啦

攪好之後就可以+入古古力啦,我自己就鐘意用細粒D既,相入面個隻太大啦

預備一個喞袋,將曲奇漿放入,喺焗盤上喞成5蚊餅既size

之後就可以放入焗爐啦,200度大約焗15分鐘(當然我地整餅之前都係要預熱左先啦)

甜品班第二擊(心太軟)

今次學整心太軟
材料(4個份量):朱古力 100g,牛油100g,全蛋兩隻,蛋黃兩隻(無錯前後係4隻),砂糖 25g,低筋麵粉30g,雲呢拿油 數滴(又有佢份呀)
做法:將朱古力磨碎

用錫紙包好個模

包好之後就可以去準備蛋同朱古力啦
將蛋黃同全蛋打落個兜兜到,另一個就放朱古力

跟住將牛油塗滿個模,平均就ok啦,多左就倒返出黎,如果唔係就會變左煎蛋糕啦

塗完牛油,就撲上面粉,又係夠就算啦,多左倒返出黎,太多個蛋糕會變左脆皮=.=

將砂糖加入蛋漿

將蛋漿打至起泡再+入雲呢拿油

切好牛油放入朱古力,再將朱古力盆放入熱水中(熱溶)

將麵粉篩鬆+入朱古力漿,再拌勻(不能太耐,杰左蛋糕就發唔大)

將焗爐預熱180度大約10分鐘

將朱古力漿倒入先前預備好既模,大約6成滿

放入焗爐焗大約10分鐘(太耐會全熟,就唔會有朱古力漿流出黎啦)

完成就會咁樣流出黎啦,口水都流埋添呀

上網有$$搵????

早幾日打算上網睇下有無野做啦,咁比我見到有d上網搵$$既野,好~~~~入去睇下先
入到去原來係d廣告既野,要d/l個bar落黎,開左佢,就會有個人仔係到行,一路行就一路計分,每1000就係有1.666667美金,唔知係咪真ka呢,試下係咪真有$$收先

做甜品(第一堂木糠布甸)

話說尋日去左我恨左好耐既學整甜品班,呢個班好抵,因為係社區中心搞既,$240兩個人,學4款甜品,有邊4樣野學呢,(1)布糠布甸(2)心太軟[即係朱古力軟心蛋糕](3)杏仁曲奇(4)雲石芝士蛋糕
咁尋日係第一堂,就係學整布糠布甸
材料(二人分量):淡忌廉200g,煉奶40g,雲呢拿油數滴,唂咕粉適量,瑪莉餅8片
做法:將瑪莉餅壓碎,當佢係仇人咁壓,碎到粉狀


之後將200g既淡忌廉放入個兜到,用攪拌機打到佢企身,有紋就要停,再攪又會變返水,前功盡廢


打好忌廉之後就要準備+入煉奶同雲呢拿油啦(啡色個個就係雲呢拿油啦)

再攪混佢,但係又唔可以攪太耐,兩三下好啦,因為攪得耐d忌廉又會變返稀=.=

之後就可以將之前準備好既野入杯啦

首先放左d餅碎係杯低,放忌廉,再放唂咕粉,重複再做,就完成啦



小插曲
我個fd論論盡盡咁倒瀉左佢個杯,就係因為我地既忌廉稀左=.=所以,唉~~~~~~~

好彩亞sir個到有多,就比佢整多一杯啦

本來好高興,點知好嬲

話說上年既5月1號,我同老公去左澳門影一生人一次既婚紗相,個日天氣非常咁好,我地同個攝影師都好滿意d相,咁攝影師就問我介唔介意比d相佢地做promo,我就話做promo都得,咁你公司有咩送返比我先,我唔係貪心,但係做promo就即係幫你做宣傳,我都要有返我既酬勞丫,個攝影師就話無,我就同佢地講,無野比返我的話我就唔會比你地做promo啦,到左今日我姑姐打黎話我表弟要結婚啦,問我去邊到影結婚相好,我仲打算介紹佢地去呢間野到影相,點知......比我上到佢地個wed site到見到我既相,嘩~~~~~~~~~~~我當時真係好嬲~~~嬲到唔知點形容,我究竟告佢好丫,定係叫佢地賠償比我好呢????

最慘痛的4天

4月1號入醫院, 一入到去搞一大輪手續之後,就慘被醫生放藥,放藥之後,唔使15分鐘就開始肚痛,每3個鐘放一次藥,我對啲藥既反應太大,一放藥就開始發燒,仲要燒到39度, 卒之,放左3次藥之後,醫生話我燒得太高,叫我抖下先,第二日先再放藥!!!!!總括黎講呢日都唔算太辛苦,發燒都只係訓訓訓~~~
4月2號一早9點醫生又開始幫我放藥,呢日都唔算燒得好利害,所以都可以完成晒1日5次藥既療程,到最後一次藥都好似反應唔係好太,肚既痛都仲可以忍受,點知越夜就越痛,姑娘一早就同我講,如果痛到頂唔住可以叫打止痛針,我仲大大聲話唔使,到左3點幾,真係忍唔到啦,要叫姑娘打針啦,個種痛無辦法去形容,打完止痛針都仲要痛多個幾鐘先穿到羊水=.=個陣已經係4月3號凌晨4點幾5點啦,羊水穿左之後唔使5分鐘虫虫怪獸都出埋黎啦,佢個樣好似我,其實都好似爸爸ka,不過佢好細,佢既手臂好似我既手指尾咁粗,個頭仔好細,只有桃駁李咁大,比拳頭還要細,腳仔好長,好似爸爸咁瘦瘦地,幾好丫,好奇怪,虫虫怪獸一出左黎個肚已經唔再痛,成晚無訓,個人好攰,一直d姑娘都唔比我訓,直到中午12點幾我先可以訓到一陣,到5點醫生巡房,我又要起身,醫生話我之前d體溫咁唔穩定唔比我走,要我訓多一日醫院
4月4號卒之可以出院啦,點知搵唔到爸爸,姑娘又話一定要屋企人接先可以出院,咁唯有打比媽咪叫佢接我出院啦,點知等到兩點,爸爸無啦啦出現,佢比我鬧左一餐,我鬧佢無分寸,明知我一早出院又唔開電話,call佢又覆,我話比佢知,我叫左媽咪接我出院,佢又唔高興,我話[點知等到你幾時呀,等埋媽咪黎就去睇亞B睇完就走啦],等齊人之後就同姑娘講我地想見亞B,姑娘將亞B推左去一間房比我地見,再見到亞B啦,佢真係好似我,連媽咪都講佢似我,爸爸只係望左亞B一眼就掉頭走,我唔知係佢驚傷心定係唔想見,算啦,亞B我會好掛住你ka.

feel到虫虫怪獸陏啦

今個星期係第20週,已經feel到虫虫係我個肚到陏啦,一開始feel到佢陏,又好似唔係好捨得要佢走=.=早兩日仲有個客話幫我問左個高人,高人話虫虫會係一個好聰明既小朋友=.=咁我信唔信好呀???但係我信佢比虫虫出左黎,點知真係有問題咁我又點算呀????唉~~~~~~~~~~~~好矛盾

2月27日

今日約左見個遺傳學醫生,去到醫生只係問左一d家庭歷史,爸爸B有幾多個兄弟姊妹,我有幾多兄弟姊妹,我地既父母仲健唔健在咁,之後就問返我點解會過黎睇遺傳學,知唔知係咩事?
我心諗呢d野唔係你已經知ka咩,做咩仲要問我姐?
問晒要問我既問題之後,到我問佢,咁虫虫呢個病係全世界入面有無一樣既病例?佢只係答我,有類似,以咁多病例入面,大約有5~10%會係肢體殘缺或者腦部發展遲緩,咁我就同佢講,婦產科個到話虫虫既結構暫時都未有問題,咁係咪既係要等佢出左世先可以肯定佢係咪低DD???醫生話都可以咁講=.=
咁即係話又係要博=.=""""""
返到屋企,我問爸爸B,係咪真係咁堅持要keep住虫虫先,呢樣野要諗得好清楚,因為到虫虫出左世之後,所有野,都無得返轉頭,我地仲要唔知佢係咪真係有問題仲要等佢大個左先知佢係咪有病=.=到時大家都辛苦,到我地兩個都死左既時候又有邊個可以幫我地去照顧呢個一世都長唔大既小朋友呢?
點知,爸爸B好悔氣咁話:『咁咪唔要囉,唔好再問我呢個問題.......』
.........咁我又好想去面對呢個問題咩,我地兩個都無問題,點解我地唔等下一次機會再要一個一定無問題姐....我都唔想大家都唔開心ka

內心爭鬥

話咁快又一個月啦,過左新年之後,突然有一日姑娘打黎叫我同爸爸去抽血,抽左血之後,又點呢?等到22號就係時候同虫虫度下有無高左同埋仲要睇埋我地既驗血報告,究竟要我地去驗血做d咩呢?
到左22號啦,我地約左3點,等到差唔多4點半先到我地,醫生話所有報告都出晒啦,虫虫真係有問題呀=.="""問題係虫虫既第17組染色體同第19組染色體既其中一部份互相調換左,份報告話呢個問題只係虫虫自己突變,我同爸爸係無咁既病例,到而家為止香港未有呢個組合既病例,即係話虫虫係第一個,連醫生都話唔到比我地知佢既情況將會係點,咁我地又要去睇多一個醫生(遺傳學科),去搵下全個世界有無虫虫呢個病既組合,當日醫生除左話左比我地知呢個唔知係好定壞既消息之後,咁我地就埋位去照超聲波啦,點知原來度虫虫既高度已經唔係好似之前咁,由個頭頂度到去個patpat,而係度下個頭仔,肚腩仔,同埋個豬脾仔既大細同長度,虫虫fit晒18週既size,之後又check晒所有手指腳指齊唔齊,d內臟又岩唔岩位,有無生漏左咁,一切一切都好正常結構完全無事,咁我地仲難決定去向......

=.=今日去左抽絨毛

1月17號同虫虫度高,虫虫有6.81cm咁高,但係醫生話頸皮好厚,所以要排期抽絨毛睇下係咪有事,今日1月21號同虫虫度多左一次高,有7.28cm咁高,但係頸皮都無乜點薄過=.=,跟住醫生就同超聲波同我度位,睇下邊個位先唔會拮到虫虫,度好位之後,醫生拎左幾支好長既針出黎,我咁大個女最怕就係痛,支麻醉針有成兩吋長,之後抽絨毛支針仲長痴線ka,有成7吋長=.=,醫生打支麻醉個陣,好痛,d藥都未到就拮埋第二支入黎,我即刻問醫生,可唔可以等等先,真係好痛,醫生就答我,一陣就唔痛ka啦,仲有,子宮唔打得麻醉針,有d痛忍一忍就無事=.=,拮入去個肚皮個一下,痛到透唔到氣,之後,到個子宮個一下,又無我想像中咁痛,不過好(淵),呢d都未係最辛苦,反而係d麻醉藥到左10分鐘之後先辛苦,扯住扯住咁,入面又赤,唉~~~~~~~~~~~~~~~~why me?????

今年生日好特別2008年1月19號

今年既生日真係好特別,同之前個d好唔同,一來有虫虫怪獸同我過,二來今年生日係我表姐結婚,我地一家11人上左去高明飲,好開心,本來仲諗住同虫虫怪獸照多一次超聲波ka,點知個到個醫生放假,咁算啦,橫掂第二日返到黎香港都要做多一次檢驗

對虫虫怪獸既一段話

自從11月中我知道我有左隻虫虫怪獸開始,曾經有諗過唔要你,但係到而家,虫虫怪獸,我足足同你生活左13個星期啦,今日當我知道你可能有問題既時候,我以為我可以好冷靜咁去面對,但係當爸爸今晚叫我比佢抱抱既時候我卒之都決堤啦"=.="由唔想要你到接受左你,到將會有可能再同你分開,心情就好似當初同你爸爸分手既心情一樣,個心好痛,又唔知點算,虫虫怪獸我真係好希望醫生今日既診斷係錯既,test係無事,我都好希望我地可以係7月26號我地預期個一日見面,虫虫怪獸要加油呀,媽媽今日開始會乖,你都要乖呀